Alimlər soyuq qida və içkilərin qəbulu zamanı dişlərdə yaranan ağrının səbəblərini araşdırıblar.
Yurd.Media xarici mətbuata istinadən xəbər verir ki, tədqiqatçılar qrupu dişlərin aşağı temperatura ağrı reaksiyası verməsinin mexanizminin öyrənilməsində mühüm nəticələr əldə etdiklərini açıqlayıb.
Əvvəllər belə hesab olunurdu ki, diş minası sinir uclarını tam şəkildə mühafizə edir. Ancaq yeni tədqiqat üzə çıxarıb ki, bu prosesdə əsas funksiyanı odontoblast hüceyrələri yerinə yetirir.
Odontoblastlar bərk mina təbəqəsi ilə yumşaq diş pulpası arasında mövqelənir. Soyuq təsirlə qarşılaşdıqda məhz bu hüceyrələr ağrı siqnallarını ötürərək orqanizmi temperatur dəyişikliyindən xəbərdar edir. Diş problemləri olan şəxslərdə bu hüceyrələrin sayı xüsusilə çox olur ki, bu da yüksək həssaslığın izahını verir.
Tədqiqatçılar təsdiq ediblər ki, xalq təbabətində geniş tətbiq olunan mixək yağı doğrudan da ağrını yüngülləşdirir. Bunun əsas səbəbi tərkibindəki evgenol maddəsidir – o, müvəqqəti olaraq odontoblast hüceyrələrinin fəaliyyətini bloklamaqla dişlərin həssaslığını azaldır.
Araşdırmaçılar evgenol ehtiva edən saqqızın istehsalı imkanlarını dəyərləndirirlər. Bu cür məhsul diş ağrısını müvəqqəti aradan qaldırmağın və soyuğa qarşı həssaslığı azaltmağın asan və operativ üsulu ola bilər. Bu kəşf həssas dişləri olan insanların soyuq qidanı daha rahat qəbul etməsinə imkan yaradacaq yeni gigiyena və profilaktika vasitələrinin işlənib hazırlanması üçün geniş perspektivlər açır.
