"FINCA Azerbaijan" MMC bank olmayan kredit təşkilatı (BOKT) 2025-ci ilin yekunları ilə bağlı maliyyə göstəricilərini açıqlayıb.
Yurd.Media xəbər verir ki, kredit təşkilatı ötən il 1,6 milyon manat xalis mənfəət əldə edib. Bu, əvvəlki illə müqayisədə 48,7% və yaxud təxminən 2 dəfə azdır.
Bu ilin əvvəlinə "FINCA Azerbaijan"ın aktivləri ötən ilin əvvəlinə nisbətən 1,8% az - 75 milyon manat, o cümlədən kredit portfeli 1,5% az – 63 milyon manat təşkil edib.
BOKT-un öhdəlikləri 57,6 milyon manat (1,2% az), balans kapitalı isə 17,4 milyon manat (3,5% az), o cümlədən nizamnamə kapitalı 3,8 milyon manat (dəyişməyib) olub.
Qeyd edək ki, “Finca Azərbaycan" 1998-ci ildə yaradılıb. Mikromaliyyə təşkilatının nizamnamə kapitalının 100%-i Niderlandda qeydiyyatdan keçmiş “Finca Microfinance Cooperatief U.A” şirkətinə məxsusdur.
Şirkət son dövrdə problemli kreditlərlə bağlı tez-tez məhkəmələrə müraciət etməli olur. Belə ki, BOKT 27 və daha artıq faizlə verdiyi kreditlərə görə müştərilərinə qarşı Şəmkir, Sabirabad Rayon Məhkəməsində, Ağdam Rayon Məhkəməsində və Xaçmaz Rayon Məhkəməsində iddia qaldırmışdı.
