"Gəncə Körpü Tikinti-2" ASC cari ildə dövlət qurumlarından 7-ci irihəcmli sifarişini alıb.
Yurd.Media "Qaynarinfo"ya istinadən xəbər verir ki, tikinti maqnatı kimi tanınan Aqibət Məmmədova məxsus olduğu bildirilən "Gəncə Körpü Tikinti-2" ASC daha bir iri məbləğli tenderin qalibi seçilırık Quba Rayon İcra Hakimiyyətinin Quba şəhərində abadlıq işlərinin satın alınması ilə bağlı keçirilən tenderin qalibi elan edilib.
Abadlıq işlərinə görə şirkətə 1 940 min manat ödəniləcək.
"Gəncə Körpü Tikinti-2" ASC bundan əvvəl Şəmkir Rayon İcra Hakimiyyəti Başçısının Şəmkir Şəhər Nümayəndəliyinin, Gəncə Şəhər İcra Hakimiyyətinin tabeliyində fəaliyyət göstərən Gəncə Şəhər Mənzil-Kommunal Təsərrüfatı Birliyinin (MKTB), Bakı Şəhər İcra Hakimiyyətinin tabeliyində fəaliyyət göstərən "Bakı Şəhər Əsaslı Tikinti və Təmir” MMC-nin və Quba Rayon İcra Hakimiyyətinin tenderlərində qalib seçilib.
"Gəncə Körpü Tikinti-2” ASC-nin 2025-ci ildə qazandığı tenderlər üzrə satınalma müqavilələrinin ümumi maliyyə dəyəri 41 315 449,86 manat təşkil edir.
İqtisadiyyat Nazirliyi yanında Dövlət Vegri Xidmətinin reyestr məlumatlarına görə, "Gəncə Körpü Tikinti-2" ASC 16 oktyabr 2024-cü ildə qeydiyyata alınıb. Nizamnamə kapitalı 143 104 manatdır. Hüquqi ünvanı Bakı şəhəri Nərimanov Rayonu, Əhməd bəy Ağaoğlu küçəsi, ev 10A-da yerləşir. Şirkətin qanuni təmsilçisi Zeynallı Məhərrəm Aslan oğludur. Məhərrəm Zeynalı ASC-nin İdarə Heyətinin sədri, Aqibət Məmmədov isə Direktorlar Şurasının sədridir.
