Zaqatalada istehsal olunan fındıq məmulatları dünya bazarlarında da məşhurdur. Artıq məhsul yığımına başlanılıb.
Yurd.Media xəbər verir ki, bu il məhsul ötən ilə nisbətən xeyli zəifdir. Hazırda tez yetişən fındığın yığımı həyata keçirilir. Bununla bərabər bağlarda təmizlik işləri aparılır. "İctimai Tv" - ə danışan Pərzivan kənd sakini İsmayıl Məmmədov məhsul yığımının təmiz olması üçün lazımi işləri gördüklərini bildirib.
"Ata-babadan ənənəmiz belədir, davam edirik. Məhsulun yaxşı olması üçün əlimizdən gələni edirik".
Rayonun Zilban kəndində yaşayan Kaştayevlər ailəsi gəlirlərini məhsul becərilməsindən əldə edirlər. Ailə başçısı fındıq bağını suvarmaq üçün 2000 metr məsafədən çaydan su xətti çəkib. Lazımi qulluq göstərib, lakin yaxşı məhsuldarlıq əldə etməyib.
"Keçən il bizdə 300-400 kq fındıq olmuşdu, bu il isə bütün fındıqların içi boşdur. Lazımi qulluğu edirik, lakin nəticə yaxşı olmur. Əsas məsələ odur ki, tozlanma vaxtında soyuq olur və nəticə yaxşı olmur". Eyni vəziyyətlə digər kənd sakinləri də üzləşiblər. Mütəxəssis Nərgiz Abdullayevanın sözlərinə görə bir sıra xəstəliklər yayılıb. "Müəyyən xəstəliklər yayılıb. Bu da hava şəraitindən irəli gəlir. Bunun qarşısını almağın əsas yolu budamadır. Budama prosesini əkin sxeminə uyğun aparsalar, həmin yerdə məhsulun keyfiyyəti yaxşı ola bilər".
Qeyd edək ki, hazırda Zaqatalada 20190 hektar fındıq bağları var. Bunun 17 min hektara yaxını bar verən sahələrdir. Həmçinin keçən il rayonda 25 min ton qabıqlı məhsul istehsal edilib.
