Bu il iyulun 1-nə Azərbaycandakı 22 bankdan 3-nün kredit portfeli 2 milyard manatdan çox olub.
Yurd.Media apardığı araşdırmaya görə, bunlar “Azərbaycan Beynəlxalq Bankı”, “Kapital Bank” və “PAŞA Bank”dır. Bu bankların cəmi kredit portfeli 14 milyard manatdan çox olub.
Hesabat tarixinə 4 bankın kredit portfeli 1 milyard manatdan 2 milyard manata qədər, 6 bankın kredit portfeli 500 milyon manatdan 1 milyard manata qədər, 8 bankın kredit portfeli 100 milyon manatdan 500 milyon manata qədər dəyişib, 1 bankın – İran Milli Bankının Bakı filialının isə kredit portfeli 1 milyon manat civarında olub.
Son 1 ildə 22 bankdan 19-nun kredit portfeli artıb, 3-nün kredit portfeli isə azalıb. Kredit portfelini çox artıran bank Türkiyə kapitallı “Zıraat Bank Azərbaycan” (38,2%), ən az artıran bank isə “Bank Avrasiya” (0,2%) olub.
İl ərzində “Bank BTB”, “Xalq Bank” və İran Bankının kredit portfeli isə müvafiq olaraq 0,1%, 2,6% və 53,4% azalıb.
