Əgər 20-30 yaşlarında sağlamlığınıza diqqət yetirmisinizsə, 40 yaşından sonra ciddi problemlərlə üzləşmə ehtimalınız azdır. Lakin bunu etməmisinizsə belə, narahat olmağa dəyməz. Sağlamlığınızı yaxşılaşdırmaq və bir sıra xəstəliklərin qarşısını almaq hələ də mümkündür.
Yurd.Media 40 yaşdan sonra qadınların yol verdiyi 6 əsas səhvi diqqətinizə çatdırır:
Qırx yaşından sonra qadın orqanizmi ciddi dəyişikliklərə məruz qalır: metabolizm zəifləyir, estrogen hormonu azalmağa başlayır. Bununla belə, aşağıdakı altı səhvdən uzaq dursanız, ümumi sağlamlıq vəziyyətinizi nəzərəçarpacaq dərəcədə yaxşılaşdıra və gələcək illər ərzində sağlam həyat tərzi sürə bilərsiniz.
1. Göz sağlamlığına laqeyd yanaşma
Bir çox insan bədəninə qulluq etsə də, gözlərinə qayğı göstərməyin əhəmiyyətini nəzərdən qaçırır. Əgər uzun müddətdir gözlərinizi müayinə etdirməmisinizsə, 40 yaşından sonra mütləq mütəxəssisə müraciət edin. Bu addım qlaukoma və quru göz sindromu kimi ciddi xəstəliklərdən qorunmağa yardımçı olacaq. Klivlend Universiteti Tibb Mərkəzinin oftalmoloqu Emi Zanq bildirir ki, yaşla əlaqəli görmə dəyişiklikləri 40 yaşdan sonra tez-tez müşahidə olunan presbiopiyanın — yaxın məsafədəki əşyalara fokuslanmada çətinliyin yaranmasına səbəb ola bilər.
2. Doğuşa nəzarət məsələlərini diqqətdən kənarda qoymaq
Reproduktiv qabiliyyət yaşla birlikdə azalsa da, arzuolunmaz hamiləlik riski menopauza dövrünə qədər davam edir. Floridadan olan ginekoloq Maureen Velixan xəbərdar edir ki, doğuşa nəzarət qırx yaşından sonra cinsi həyat yaşayan qadınlar üçün hələ də vacibdir, belə ki, planlaşdırılmamış hamiləlik hər yaşda baş verə bilər. Oral kontraseptiv vasitələr yalnız hamiləliyin qarşısını almaqla kifayətlənmir, həm də menstruasiya dövründə qan itkisini azaldır, premenstrüel sindromu idarə etməyə kömək edir, yumurtalıq və uşaqlıq boynu xərçənginin inkişaf riskini minimuma endirir.
3. Sümük və əzələ sıxlığına fikir verməmək
40 yaşından etibarən qadın orqanizmi sümük kütləsinin itirilməsinə və əzələ tonusunun zəifləməsinə yol açan hormonal dəyişikliklərə məruz qalır. Osteoporozun qarşısını almaq məqsədilə kifayət qədər kalsium və D vitamini qəbul etmək böyük əhəmiyyət daşıyır. Qidalanma mütəxəssisi Heather Mangieri hər gün üç porsiya süd məhsulu istehlak etməyi və ya orqanizmin tələbatını ödəmək üçün əlavə vitaminlər qəbul etməyi məsləhət görür. Mütəmadi olaraq çəki ilə aparılan fiziki məşqlər də sümük və əzələ sağlamlığını qorumaqda mühüm rol oynayır.
4. Döş müayinəsinə etinasız münasibət
Amerika Xərçəng Cəmiyyəti 40 yaşından etibarən hər il mamoqrafiya müayinəsindən keçməyi tövsiyə edir. Mütəxəssislər hesab edir ki, döş xərçənginin erkən mərhələdə aşkarlanması uğurlu müalicə ehtimalını xeyli yüksəldir. Skrininq mamoqrafiyası 40-74 yaş arasında olan qadınlarda döş xərçəngindən ölüm hallarının azalmasına kömək edir. Dəyişiklikləri vaxtında müəyyən etmək üçün yalnız müntəzəm tibbi müayinələr deyil, həm də süd vəzilərinin müstəqil şəkildə yoxlanılması zəruridir.
5. Yuxu çatışmazlığı
İş və ailə öhdəlikləri çox zaman yuxusuzluğa gətirib çıxarır ki, bu da sağlamlığa ciddi mənfi təsir göstərir. Mayo Klinikasının yuxu üzrə eksperti R.Robert Auqer qeyd edir ki, xroniki yuxu çatışmazlığı və istirahətsizlik ürək-damar xəstəliklərinin və piylənmənin yaranma riskini artıra bilər. Sağlamlığı qorumaq üçün gecədə 7-9 saat yuxuya vaxt ayırmaq və sabit yuxu rejiminə əməl etmək məsləhət görülür.
6. Qan şəkəri səviyyəsinə nəzarətin olmaması
40-45 yaşından sonra II tip şəkərli diabet riskini təyin etmək üçün qlükoza və hemoqlobin göstəricilərini müntəzəm yoxlatdırmaq vacibdir. Testin nəticəsi normal olsa belə, hər üç ildən bir təkrar müayinə aparılmalıdır. Prediabet vəziyyəti aşkar edildiyi halda, düzgün qidalanmaya keçmək və mütəmadi fiziki fəaliyyətlə məşğul olmaq lazımdır. Bədən çəkisinin 5-7% azaldılması və həftədə 5 dəfə gündə 30 dəqiqə fiziki məşq etmək şəkərli diabetə tutulma riskini 60%-ə qədər aşağı sala bilər.
Qırx yaşından sonra qadınlar bu yanlışlıqlardan uzaq duraraq sağlamlıqlarına daha çox diqqət yetirə, gələcəkdə bir çox xəstəliklərin qarşısını ala bilərlər.
