Təyyarə səyahətindən əvvəl spirtli içki qəbulu ciddi sağlamlıq problemlərinə səbəb ola bilər, çünki bortda aşağı təzyiq və oksigen çatışmazlığı şəraitində orqanizmin alkoqola reaksiyası qeyri-müəyyən olur. Yurd.Media life.ru-ya istinadən xəbər verir ki, bu barədə narkoloq Andrey Tyurin xəbərdarlıq edib. "Təyyarədəki hava səhradan daha qurudur — onun nəmliyi 20 faizdən azdır. Alkoqol orqanizmi əlavə olaraq susuzlaşdırır ki, bu da uçuşdan sonra baş ağrısına, ürəkbulanmaya və güclü yorğunluğa səbəb olur", — deyə Tyurin izah edib. Narkoloqun sözlərinə görə, alkoqol nəbzin tezləşməsinə və damarların spazmına səbəb olur ki, bu da ürək-damar sisteminə əlavə yük yaradır. Bu, uçuş zamanı hipertonik kriz, taxikardiya və hətta panika hücumları ehtimalını artırır. Həkim xüsusilə xroniki xəstəlikləri olan insanlara təyyarə səyahətlərindən əvvəl spirtli içkilərdən tamamilə imtina etməyi tövsiyə edir.
