Azərbaycanın daha bir bankı öz sosial media paylaşımında dövlət bayrağını yanlış təsvir edib.
Yurd.Media "İqtisadiyyat.az"a istinadən xəbər verir ki, Azərbaycan Sənaye Bankı ASC 17 Noyabr - Milli Dirçəliş Günü münasibətilə sosial şəbəkə səhifələrində etdiyi paylaşımda kobud səhvə yol verib.
Bankın süni intellektlə hazırlanmış paylaşımında Azərbaycan bayrağı düzgün təsvir olunmayıb.
Dövlət bayrağının üzərində əks olunmuş ulduzun güşələrinin sayı artırılaraq 10-a qaldırılıb, bu isə anlaşılmaz görüntü ortaya çıxarıb.
Dövlət bayrağının istifadəsi qaydaları haqqında qanunun 11-ci maddəsində dövlət bayrağı haqqında qanunvericiliyin pozulmasına görə məsuliyyət nəzərdə tutulur.
Bu Qanunun tələblərinə zidd istifadəsi, habelə Azərbaycan Respublikasının Dövlət bayrağı barədə təhqiredici hərəkətlər Azərbaycan Respublikasının qanunvericiliyinə uyğun olaraq məsuliyyətə səbəb olur.
Qeyd edək ki, bu Azərbaycan bankları arasında ilk belə hal deyil. "Xalq Bank" ASC də 9 Noyabr - Bayraq Günü münasibətilə sosial şəbəkə səhifələrində etdiyi paylaşımda dövlət bayrağının üzərində əks olunmuş ulduzun güşələrinin sayını 7-yə endirmişdi.
Xatırladaq ki, ASB 1996-cı ildə "Capital Investment Bank" adı ilə fəaliyyətə başlayıb, 2006-cı ildə rebrendinq edib. Onun nizamnamə kapitalı 60 milyon manatdır. Bankın səhmlərinin 98,4252%-i "Anadolu Investment Company" MMC-yə, 1%-i Leyla Goozal Kurta, 0,5748%-i isə "Azərbaycan Sənaye Lizinq" MMC-yə məxsusdur.
