"PASHA Pay" şirkətinin "m10" ödəniş platformasında yenidən problemlər yaranıb.
İstifadəçilərin Yurd.Media-ya verdikləri məlumata görə, hazırda "m10" hesabından bank kartlarına köçürmə etmək mümkün deyil.
Proqramdan istifadə edən digər şəxslər proqram vasitəsilə kredit ödənişinin mümkün olmadığını bildirirlər.
Qeyd edək ki, fevralın 3-də də bu platformada problemlər yaranmışdı. Ötən gün "PASHA Pay" şirkəti məlumat yayaraq bütün əməliyyatların tam bərpa olunduğunu bildirmişdi.
"Fevralın 3-də m10 platformasında xarici mənşəli "merchant"lardan bəzi istifadəçi hesablarına müəyyən məbləğlərdə vəsait daxil olması qeydə alınıb. Təhlükəsizlik və tənzimləyici tələblərə uyğun olaraq, sözügedən hesablar müvəqqəti olaraq dondurulub", - məlumatda qeyd olunmuşdu.
Xatırladaq ki, "PASHA Pay"in məhsulları olan m10 elektron pulqabısı və Milliön terminallarından 5 milyondan çox şəxsin istifadə etdiyi bildirilir.
