Şamaxı-Qonaqkənd avtomobil yolunda yenidən torpaq sürüşməsi baş verib.
Yurd.Media xəbər verir ki, sözügedən yol 2019-cu ildə əsaslı şəkildə yenidən qurularaq istifadəyə verilib. Lakin cəmi iki il sonra - 2021-ci ildən etibarən ərazidə torpaq sürüşmələri qeydə alınmağa başlayıb.
Hazırda yolun təxminən 30-40 metr uzunluğunda hissəsi ciddi şəkildə zədələnib. Bir hissəsi demək olar ki, tamamilə uçquna məruz qalıb. Kənd istiqamətində hərəkət edən zolağın kənarında dərin uçurum yaranıb.
"Xəzər Xəbər"in ərazidən hazırladığı reportajda görünür ki, hazırda sürüşməyə məruz qalan sahədə nəqliyyat vasitələri yalnız təxminən 50 santimetr enində qalan asfalt zolağı ilə hərəkət edir. Həmin hissədə də asfalt örtüyündə çatlar əmələ gəlib və yolun tamamilə uçmaq təhlükəsi qalmaqdadır.
