“Beynəlxalq Sığorta Şirkəti” Açıq Səhmdar Cəmiyyətinin (ASC) borclu şəxslə məhkəmə çəkişməsi başa çatıb.
Yurd.Media-nın əldə etdiyi məlumata görə, şirkət B. Əsədulla oğlundan 4255 manat sığorta ödənişi və 30 manat dövlət rüsumunun tutulması ilə bağlı məhkəməyə müraciət edilib. Bununla bağlı məhkəmə tərəfindən qətnamə çıxarılıb və icraya yönləndirilib.
Borclu ödənişi təmin etmədiyi üçün onun “Mercedes 230” minik markalı avtomobilin üzərinə həbs qoyulub.
İqtisadiyyat Nazirliyi yanında Dövlət Vergi Xidmətinə verilmiş sorğuya əsasən 2002-ci ildə dövlət qeydiyyatından keçən "Beynəlxalq Sığorta Şirkəti” ASC-nin 2020-cı ildə ləğv olunaraq dövlət reyestrindən çıxarıldığından iş üzrə icraata xitam verilib.
Bu səbəbdən də Xəzər rayon İcra şöbəsinin icra məmuru borcluya məxsus avtomobilin üzərinə qoyulmuş həbsin götürülməsi barədə təqdimatla məhkəməyə müraciət edib. Məhkəmə təqdimatı təmin edib və avtomobilin üzərinə qoyulan həbs götürülüb.
