“Mark Supply” Məhdud Məsuliyyətli Cəmiyyət (MMC) cərimə olunub.
Yurd.Media-nın əldə etdiyi məlumata görə, şirkət tərəfindən 49 230 ABŞ dolları məbləğində vəsait bank vasitəsilə 2024-cü il tarixində avans olaraq ölkə xaricinə köçürülüb.
"Azərbaycan Respublikasının rezidentlərinin xarici valyutada, habelə qeyri-rezidentlərin milli və xarici valyutada əməliyyatlarının aparılması Qaydaları"nın 4.3.1.3-cü yarımbəndinin tələblərinə baxmayaraq, ödənişin aparıldığı gündən 2 il müddətində həmin vəsait hesabına alınan mallar ölkəyə idxal edilməyib və ya həmin məbləğdə valyuta vəsaiti geri qaytarılmayıb.
Azərbaycan Mərkəzi Bankı tərəfindən “Mark Supply” MMC-nin barəsində İnzibati Xətalar Məcəlləsinin 430.4-cü maddəsi ilə protokol tərtib edilib.
Suraxanı Rayon Məhkəməsinin qərarı ilə MMC barəsində inzibati xətanın bilavasitə obyekti olmuş 49 230 ABŞ dolları məbləğində vəsaitin 20 faizi məbləğində, yəni 9 846 dolların ödəniş gününə qüvvədə olan Azərbaycan manatına məzənnəsi ilə inzibati cərimə növündə inzibati tənbeh tətbiq edilib.
Qeyd edək ki, “Mark Supply” MMC 3 ildir fəaliyyət göstərir. Mirrəhim Rəhimzadənin rəhbərlik etdiyi şirkətin hazırda dövlətə 539,5 min manat vergi borcu var.
