Qaçış zamanı bədənimizin bir çox refleksləri avtomatik işə düşür. Onlardan biri də qolların bükülmüş vəziyyətdə, ritmik şəkildə hərəkət etməsidir. Bu hal əksər insanlar üçün adi və fərqinə varılmayan bir davranış olsa da, əslində arxasında elmi əsaslar dayanır.
Yurd.Media xəbər verir ki, idman mütəxəssislərinin fikrincə, qolların bükülməsi qaçış zamanı enerjiyə qənaət, bədən tarazlığının qorunması və sürət artımı baxımından böyük əhəmiyyət daşıyır.
Biomexanika üzrə araşdırmalar göstərir ki, qollar düz halda hərəkət etdikdə daha çox əzələ gücü və enerji sərf olunur. Bükülmüş qollar isə bədənin yaratdığı fırlanma qüvvələrini balanslaşdırır, addım ritmini dəstəkləyir və qaçışın daha axıcı olmasını təmin edir.
Bu maraqlı refleksin yalnız insanlarda deyil, bir çox heyvan növündə də müşahidə edilməsi onun təbiət tərəfindən “sınaqdan çıxmış mexanizm” olduğunu göstərir.
