Sağlamlıq problemlərini uzun müddət ərzində müalicə etməkdənsə, onların qarşısını əvvəlcədən almaq qat-qat məqsədəuyğundur.
Yurd.Media xəbər verir ki, balanslaşdırılmış qidalanma, mütəmadi fiziki aktivlik və zərərli vərdişlərdən əl çəkmək ürək-damar xəstəliklərinin profilaktikasında ən təsirli vasitələr hesab olunur.
İrsi meyllilik və yaş kimi müəyyən amillər insanın idarə edə bilməyəcəyi səbəblər olsa da, infarkt riskinin azaldılmasına yardımçı olan müəyyən prinsiplər mövcuddur. Hər şeydən əvvəl siqareti tərk etmək zəruridir. Belə ki, siqaretdən imtina infarkt ehtimalını 65% aşağı salır.
Mütəxəssislər stresin ürək sağlamlığına mənfi təsiri barədə xəbərdarlıq edərək açıq havada aktiv olmağı, meditasiya ilə məşğul olmağı, keyfiyyətli yuxu almağı, yaxınlara və ailə üzvlərinə vaxt ayırmağı, həmçinin həftədə minimum 150 dəqiqə müntəzəm idman etməyi məsləhət görür.
Bundan başqa qızılbalıq, qoz-fındıq kimi Omega-3 yağ turşuları ilə zəngin olan məhsulların qida rasinonuna daxil edilməsi tövsiyə olunur. Tərəvəzlər və tam taxıl məhsullarından istifadə edərək orqanizmin vitamin və mineral ehtiyatını artırmaq da böyük əhəmiyyət daşıyır.
Gündəlik qida rasinonunuzdan əlavə şəkərləri çıxarın – onlar çox vaxt emal olunmuş qida məhsullarında rast gəlinir. Gündə 25 qramdan az əlavə şəkər qəbul etmək ümumi sağlamlığınızı yaxşılaşdırmaq baxımından ən mühüm addımdır və bu, eyni zamanda infarkt riskinizi aşağı salır.
Həll olunan və həll olunmayan liflərin kifayət qədər qəbulu ürəyinizin sağlamlığını qorumaq üçün olduqca vacibdir.
