Son dövrdə yeniyetmələr və gənclər arasında enerji içkilərinin istehlakının kəskin artması tibb mütəxəssislərinin diqqətini ciddi şəkildə cəlb edir. Gənc orqanizm hələ formalaşma prosesində olduğundan enerji içkilərinin bədənə göstərdiyi mənfi təsir bu yaş qrupunda xeyli daha güclü hiss olunur. Bu içkilərin tərkibində olan yüksək miqdarda kafein, şəkər və müxtəlif süni komponentlər sinir sisteminə, ürək-damar aparatına və böyrəklərin normal fəaliyyətinə ciddi zərər vura bilir.
Yurd.Media xəbər verir ki, həkimlərin araşdırmasına görə, yüksək həcmdə kafeinin orqanizmə daxil olması təbii enerji mübadiləsini pozur və bədənin özünü bərpa etmə qabiliyyətini zəiflədir. Bu vəziyyət həm təhsil, həm də iş fəaliyyətində məhsuldarlığın aşağı düşməsinə gətirib çıxarır. Eyni zamanda, kafeinə olan fiziki və psixoloji asılılıq gənclərdə əsəbilik, həyəcan hissi və diqqətin zəifləməsi kimi problemlərə səbəb olur.
Enerji içkilərinə qarşı asılılıq gənclər arasında sürətlə formalaşır. Süni yolla əldə edilən enerjiyə öyrəşmiş bədən getdikcə daha böyük dozalar tələb edir ki, bu da enerji içkilərinin yaratdığı təhlükələr sırasında ən ciddi vəziyyətlərdən biridir. Tibb mütəxəssislərinin bu mövzudakı rəyləri birmənalıdır: 18 yaşına çatmamış şəxslərin bu cür içkiləri qəbul etməsi qida təhlükəsizliyi standartlarına uyğun deyil.
Gənclərin əhəmiyyətli hissəsi enerji içkilərini idman məşqləri zamanı performansı artırmaq məqsədilə qəbul edir, lakin bu, orqanizmə ikiqat yük bindirən təhlükəli bir vərdişdir. Fiziki aktivlik zamanı ürək ritminin artması fonunda enerji içkilərinin əlavə stimullaşdırıcı təsiri ciddi risk amili yaradır. Nəticədə ürək-damar sistemi, sinir sistemi və böyrəklər zərər görür.
Bu cür sağlamlıq problemlərinin qarşısını almaq üçün sağlam yaşam tərzinə üstünlük vermək, düzgün qidalanma prinsiplərinə riayət etmək və faydalı içkilər seçmək böyük əhəmiyyət daşıyır. Enerji içkilərinə alternativ olaraq təbii enerji qaynaqları, vitamin və minerallarla zəngin içkilər tövsiyə olunur. Qəhvə ilə enerji içkilərinin müqayisəsi aparıldıqda da təbii variantların üstünlüyü aydın görünür. Enerji içkilərinin zərərli təsirləri barədə gənclərin məlumatlandırılması və onların bu içkilərdən imtina etməsi üçün əsaslandırılmış bilgilərin paylaşılması zəruridir.
Qeyd edək ki, Azərbaycan bazarında daha çox enerji içkisi satılan "Red Bull GmbH" tərəfindən istehsal edilən "Red Bull", “Yunayted Botlinq Qrup” tərəfindən istehsal edilən “Jaquar”, “Avrora” MMC və “Berg Energy” MMC tərəfindən istehsal edilən “Bizon”, “Hell Energy” Ltd müəssisəsinə məxsus, “Aztrade” MMC tərəfindən idxal edilən “Hell”, “A+Co” ASC tərəfindən istehsal edilən “Full energy” və “Pit bull”, “Moskva Brewing Company” tərəfindən istehsal edilən “Gorilla” içkiləridir.
