Şəkidə “ABAD”çı sənətkarların “Konstitusiya və Suverenlik İli” mövzusunda hazırlanmış əsərlərindən ibarət sərgi təşkil edilib, müxtəlif sənət sahələri ictimaiyyətə təqdim olunub.
Yurd.Media xəbər verir ki, ziyarətçilər Şəkinin zəngin tarixi-mədəni irsi ilə yanaşı, ölkəmizin müxtəlif bölgələrindən gələn sənətkarların yaradıcılıq nümunələrini də yaxından izləmək imkanı qazanıblar.
Şəki “ABAD” Keramika və Tətbiqi Sənət Mərkəzinin qarşısında reallaşan tədbir çərçivəsində ölkəmizin ayrı-ayrı bölgələrindən gələn “ABAD”çı sənətkarların əl işlərindən ibarət satış-sərgi təşkil olunub, sənətkarlar tərəfindən ustad dərslər nümayiş etdirilib.
Dövlət Turizm Agentliyinin Qoruqları İdarəetmə Mərkəzinin İdarə Heyətinin sədri Murad Ağabəyli çıxışında sənətkarlıq diyarı kimi məşhur olan Şəkidə mədəni-tarixi irsin qorunub saxlanmasına hər zaman böyük diqqət göstərildiyini vurğulayıb.
Sonda tərəfdaş qurumlar və iştirakçı sənətkarlar qədim sənət ənənələrinin qorunması və təbliğindəki xidmətlərinə görə sertifikatlarla təltif olunublar.
