Milli Məclisin Xarici müdaxilələrə və hibrid təhdidlərə qarşı müvəqqəti komissiyasının sədri Ramid Namazov və nümayəndə heyətinin üzvləri Tahir Mirkişili, Kamran Bayramov, Könül Nurullayeva, Samir Vəliyev NATO Parlament Assambleyasının 71-ci illik sessiyasında iştirak edəcəklər.
Sessiyanın gündəliyi barədə Yurd.Mediaya danışan Milli Məclisin deputatı Kamran Bayramov bildirib ki, NATO PA-nın builki iclasında mövzuların müzakirəsi komitələr üzrə aparılacaq və yekun hesabatlar təqdim olunacaq.
Deputat qeyd edib ki, bu dəfəki sessiyada əsas mövzulardan təhlükəsizlik, hibrid təhdidlərə qarşı mübarizə və Ukrayna-Rusiya müharibəsi fonunda Avropanın təhdidlərə hazır olması məsələləri müzakirə olunacaq:
"Tədbirin sonunda bütün iştirakçıların da yer alacağı plenar sessiya planlaşdırılır. Yığıncaqda NATO PA-ya üzv olan dövlətlərin parlamentarilərindən başqa NATO-nun Baş Katibinin və digər vəzifəli şəxslərin də çıxışı gündəlikdədir. Onların üzv dövlətlərin nümayəndələri ilə fikir mübadiləsi aparmaları, suallarını cavablandırmaları gözlənilir".
Sessiya oktyabrın 9-dan etibarən başlanacaq.
