Bərpa olunan enerji sektoru ilə bağlı xəbərlər dərc edən "Renewables.az" portalı 5 yaşını qeyd edir.
Portalı 2 aprel 2021-ci ildə Azərbaycan Prezidentinin 230 MVt gücündə günəş elektrik stansiyasının tikintisi ilə bağlı pilot layihənin həyata keçirilməsi tədbirləri haqqında Sərəncamı ilə bağlı xəbəri dərc edərək fəaliyyətə başlayıb.
Saytın əsas məqsədi ölkədə, regionda və dünyada bərpa olunan enerji sektoru üzrə baş verən ən mühüm hadisələri oxuculara çatdırmaq, eyni zamanda ölkəmizdə bu sahənin inkişafına töhfə verməkdir.
Tərəfsiz informasiya xidməti təqdim edən portal nüfuzlu media qurumlarının istinad etdiyi mənbələr arasında yer alır.
2024-cü ildə Azərbaycanda "Yaşıl dünya naminə həmrəylik ili" çərçivəsində yaşıl enerji gündəliyinin beynəlxalq səviyyədə təşviqi məqsədilə portalın ingilisdilli versiyası istifadəyə verilib.
Xəbər saytı qısa müddətdə etibarlı informasiya mənbələrindən birinə çevrilib. Bunun nəticəsi olaraq, sayt və sosial şəbəkə səhifələri artıq dünyanın 50-dən çox ölkəsində izlənilir.
Renewables.az fəaliyyəti dövründə dünyanın 26 ölkəsində keçirilmiş 80-dən çox beynəlxalq tədbirdə media tərəfdaşı qismində iştirak edərək informasiya dəstəyi göstərib.
Yurd.Media saytının bütün kollektivi adından "Renewables.az"da çalışan həmkarlarımızı təbrik edir, onlara fəaliyyətlərində uğurlar arzulayırıq!
