"Bəzi adamlar deyirdi ki, Rasimin 40-ı çıxan kimi mütləq qurultay olmalıdır. Hətta bildirirdilər ki, qurultay olmasa, dünyanı dağıdarıq".
Yurd.Media “Yeni Sabah”a istinadən xəbər verir ki, bunu Azərbaycan Kinematoqrafçılar İttifaqın (AKİ) katibi, şair Baba Vəziroğlu bildirilib.
Onun sözlərinə görə, İttifaqa sədrliklə bağlı iki namuzədin adı hallanır - Şəfiqə Məmmədova və Əli İsa Cabbarov:
"Bu adlar şərti olaraq verilib. Əslində real namizədlər qurultayda və ya onu əvəz edən konfransda məlum olur”.
O bildirib ki, hər kəs AKİ-yə sədrliyə namizəd irəli sürmək iqtidarıdadır:
“Lakin həmin şəxslərin sədrliyə rəsmi namizəd olması da səvermə ilə müəyyənləşir. Əgər həmin namizəd səs çoxluğu qazanırsa, deməli o, AKİ sədrliyinə namizəd ola bilər. Belə olan halda sona təqribən 3-4 nəfər qalır. Onlar da yenidən səsverməyə çıxarılır. Kim çox səs toplasa, o adam Azərbaycan Kinematoqrafçılar İttifaqının sədri seçilir. Nizamnamənin tələbləri bundan ibarətdir. Başqa danışılan hər şey çayxana söhbətləridir”.
İttifaqın katibi söyləyib ki, indiki məqamda qurultay keçirilməsinin əleyhinədir. Onun fikrincə, hazırda buna ehtiyac yoxdur:
“Lakin bəzi adamlar deyirdi ki, Rasimin 40-ı çıxan kimi mütləq qurultay olmalıdır. Hətta bildirirdilər ki, qurultay olmasa, dünyanı dağıdarıq. Belə sərsəm fikirlər səslənirdi. Elə mən də deyirdim ki, nə qurultaybazlıqdır? Bütün qurumlardakı kimi bizdə də sədr vəfat edibsə, onu birinci katib əvəz edə bilərdi. Bunların çoxunun gözünü vəzifə hərisliyi bürüyüb. Ona görə də qərara gəldilər ki, qurultay keçirilsin”.
B.Vəziroğlu qeyd edib ki, AKİ sədri vəzifəsini Şəfiqə Məmmədova icra etməlidir:
“Çünki Nizamnamədə də belədir ki, sədr vəfat edirsə, onu növbəti qurultaya qədər birinci katib əvəzləyir. Yenə də artıq qurultay təyin olunub və orada qarşıdurma yaranmasını istəmirik. Qıraqdan baxıb deməsinlər ki, ortada kino yoxdur, amma bunlar sədrlik üstündə dalaşırlar. Amma görürəm ki, bu qaçılmaz olacaq. Çünki artıq qruplaşmalar yaranıb. Müəyyən tərəf deyir ki, sədr Şəfiqə Məmmədova olmalıdır. Digər tərəf də bildirir ki, başqası seçilməlidir. Hər kəs öz namizədini irəli sürür. Mənim ürəyimdə bir Rasim Balayev var idi, onu da itirdik. Amma indiki vəziyyətə baxanda Şəfiqə Məmmədovanı dəstəkləməyi düşünürəm. İttifaqda yeni təlatüm yaradılmasının tərəfdarı deyiləm”.
Qeyd edək ki, AKİ sədri, Xalq artisti Rasim Balayev martın 29-da vəfat edib. Qurum yeni sədr seçmək üçün mayın 26-da növbədənkənar qurultay keçirəcək.
Hələlik həmin vəzifəyə iki namizəd var: İttifaq sədrinin səlahiyyətlərini icra edən Xalq artisti Şəfiqə Məmmədova və qurumun katibi, rejissor Əli İsa Cabbarov.
