"Rayona təyin olunan icra başçıları nə edəcəyini tam təsəvvür edə bilmirlər" - VİDEO

Yeni icra başçıları rayona təyin olunanda nə edəcəyini tam təsəvvür edə bilmirlər.

Bunu iqtisadçı ekspert Məmməd Talıblı Yurd.Media-nın baş redaktoru Murad Əliyevin təqdimatında “Yurddaş” verilişində müsahibəsində bildirib.

Onun sözlərinə görə, icra hakimiyyəti başçılarının dəyişilməsi və ya onlar üzərində inzibati təyziqin olması, həbs dalğası problemi həll etmir:

"Onlar elə bilirlər ki, əvvəlki icra başçılarının etdiklərini təkrar etsə işi bitmiş hesab olunur".

Ekspert vurğulayıb ki, kənd təsərrüfatı bölgələrində icra strukturları ilə bağlı siyasət fərqli olmalıdır:

"Kənd təsərrüfatı rayonlarında icra başçıları qarşısında tələb qoyulmalıdır. Onların bir çoxu rayonun iqtisadi infrastrukturunu tanımır, başçısı olduğu rayonu yalnız xəritə ilə tanıyırlar - insanların mentaliteti, istehsal vərdişlərindən xəbərləri yoxdur. Köhnələrlə vidalaşır, özləri üçün bir yeni komanda yaradırlar".

Məmməd Talıblı vurğulayıb ki, bu siyasət dəyişməsə regionlarla Bakı arasında uçurum böyüyəcək.