Sumqayıt tekstil fabrikində kütləvi zəhərlənmə ilə bağlı bu gün saat 16:05 radələrindən başlayaraq Sumqayıt Tibb Mərkəzinin nəzdində olan 1 nömrəli Şəhər Xəstəxanasının İnfeksion xəstəliklər şöbəsinə 21 nəfər hospitalizasiya olunub.
Yurd.Media-nın əldə etdiyi məlumata görə, dəqiqləşdirilməmiş bakterial qida zəhərlənməsi diaqnozu ilə 18 qadın, 3 kişi zəruri tibbi xidmətlərlə təmin olunublar.
Vəziyyətləri qənaətbəxş olan şəxslər ambulator müalicə üçün evə buraxılıblar.
17:44
Sumqayıt Tekstil Fabrikində kütləvi zəhərlənmə hadisəsini iki dövlət qurumu təsdiqləsə də, fabrikin "qaynar xətt"inə edilən zəngə cavab verən şəxs faktı inkar etməyə çalışdı.
Yurd.Media Oxu.Az-a istinadən xəbər verir ki, o,açıqlamasında belə bir hadisənin olmadığını bildirdi.
Əməkdaşımız TƏBİB-in məlumatı təsdiqlədiyini xatırladandan sonra sözügedən şəxs laqeyd tonda fikrini dəyişib: "O zaman TƏBİB-dən soruşun. Mənə niyə zəng etmisiniz? Mən mühasibəm", - deyə cavabdan yayındı.
Maraqlı burasındadır ki, açıqlama verən şəxs faktı inkar edəndə "mühasib" olduğunu unudaraq qurumu müdafiə edirdi.
***
Sumqayıt tekstil fabrikində kütləvi zəhərlənmə olub.
Yurd.Media xəbər verir ki, əraziyə təcili tibbi yardım briqadası cəlb olunub.
Bildirilir ki, zəhərlənənlərin sayı 19 nəfərdir.
