Vitaminlər maddələr mübadiləsi proseslərində mühüm funksiya daşıyır, hüceyrələrin, toxumaların və orqanların normal fəaliyyətini təmin edir.
Yurd.Media xarici mediaya istinadən xəbər verir ki, amerikalı mütəxəssislər tərəfindən ABŞ Milli Sağlamlıq İnstitutu bazasında həyata keçirilən yeni tədqiqat multivitamin əlavələrinin gözlənilən yaşam müddətinə təsiri məsələsini gündəmə gətirib.
Araşdırmada təqribən 400 min ABŞ vətəndaşı iştirak edib. Tədqiqatçılar iştirakçılar arasında multivitamin istifadəsi ilə ölüm riski arasındakı bağlılığı müşahidə ediblər. İştirakçılar 30 il müddətində nəzarət altında saxlanılıb və alimlər yaş, cins, etnik mənsubiyyət, yaşam tərzi və ailənin tibbi keçmişi kimi çoxsaylı faktorları diqqətə alıblar.
Aparılan tədqiqatlar üzə çıxarıb ki, ABŞ-da böyüklərin təxminən üçdə bir hissəsi daimi olaraq multivitamin preparatları qəbul edir, lakin bu əlavələrin ömrü uzatmaq baxımından effektivliyi hələ də mübahisəli olaraq qalır.
Mütəxəssislər aşkar ediblər ki, multivitamin əlavələri qəbul edənlərin ölüm riski bu preparatlardan istifadə etməyənlərlə müqayisədə bir qədər – 4% daha yüksəkdir. Bu nəticə xüsusilə 55 yaşdan kiçik şəxslər, siqaret çəkən insanlar və normal bədən kütləsi indeksinə malik fərdlər arasında müşahidə olunub.
Bundan başqa, ali təhsilə sahib qadınlar digərlərinə nisbətən mütəmadi olaraq əlavə preparatlardan daha geniş istifadə ediblər. Eyni zamanda daha aşağı bədən kütləsi göstəricisinə və tarazlaşdırılmış qidalanma rejiminə malik olan bir sıra iştirakçılar da vitaminlərdən yararlanıblar. Multivitamin qəbulu ilə ölüm riskinin artması arasındakı əlaqə minimal səviyyədə olsa da, tədqiqatçılar bu cür əlavələrin insan sağlamlığına uzunmüddətli təsirlərini daha dərindən anlamaq üçün əlavə araşdırmaların aparılmasının vacibliyini qeyd ediblər.
