Yeni araşdırma süni intellektin "reallığın sərhədlərini bulanıqlaşdıra biləcəyini" və psixotik simptomlara səbəb ola biləcəyini deyir.
Yeni hesabata görə ChatGPT və digər populyar süni intellekt söhbət robotları insanları psixoza sürükləyir. Birləşmiş Krallıq Milli Səhiyyə Xidmətinin həkimlərinin də həmmüəllifi olduğu araşdırma, böyük dil modellərinin müdafiəsiz istifadəçilərdə "reallıq sərhədlərini bulanıqlaşdırdığına" və "psixotik simptomların başlanğıcına və ya şiddətlənməsinə töhfə verdiyinə" dair sübutların artdığı xəbərdarlığını edir.
Yurd.Media xəbər verir ki, İndependent Türkçənin bildirdiyinə görə araşdırma, insanların "söhbət robotu psixozu" adlandırılan vəziyyətə düşdüyünə dair onlarla hesabatdan sonra gəlir. Araşdırmada iştirak edən King's College Londondan neyro-psixiatr Hamilton Morrin, söhbət robotu psixozunu hələ anlaşılmağa başlanan "real bir fenomen" kimi təsvir edib.
"Linkedin"də paylaşdığı yazıda, "Bəzi ictimai şərhlər əxlaqi panika sahəsinə keçmiş olsa da, xüsusilə təsdiqləmək, qarşılıqlı əlaqə qurmaq və təqlid etmək üçün hazırlanmış süni intellekt sistemlərinin, psixozu xarakterizə etdiyi bilinən koqnitiv zəifliklərlə necə qarşılıqlı əlaqədə ola biləcəyi barədə daha maraqlı və vacib bir müzakirə aparılması lazım olduğunu düşünürük" deyə yazıb.
Maşınlar haqqında sayıqlamaların ortaya çıxdığı nöqtəni ehtimal ki, keçdik və bu sayıqlamaların maşınlarla birlikdə ortaya çıxdığı bir dövrə giririk. King's College Londonda dərs verən həmmüəllif Tom Pollack, psixiatrik pozuntuların "nadir hallarda qəfildən ortaya çıxdığını", lakin süni intellekt söhbət robotlarının istifadəsinin "tetikləyici bir faktor" ola biləcəyini söyləyib.
