Hacıqabul rayonunda bələdiyyə sədrinə cərimə yazılıb.
Yurd.Media-nın əldə etdiyi məlumata görə, rayonun Atbulaq-Navahi bələdiyyəsinin sədri Səidə Əsgərovanın barəsində İnzibati Xətalar Məcəlləsinin 253-1.1.3-cü maddəsi ilə protokol tərtib edilib.
Belə ki, bələdiyyə sədri Atbulaq-Navahi bələdiyyəsinin mülkiyyətində olan torpaq sahələrində mövcud olan yaşıllıqların uçotu və monitorinqi haqqında məlumatları aidiyyəti üzrə müvafiq icra hakimiyyəti orqanına təqdim etməyib.
Ekologiya və Təbii Sərvətlər Nazirliyi 3 saylı Regional Ekologiya və Təbii Sərvətlər İdarəsi tərəfindən tərtib olunan protokol baxılması üçün Hacıqabul Rayon Məhkəməsinə göndərilib.
Məhkəmənin qərarı ilə bələdiyyə sədri İnzibati Xətalar Məcəlləsinin 253-1.1.3-cü maddəsində nəzərdə tutulmuş inzibati xətanı törətməkdə təqsirli bilinib və 1000 manat cərimə edilib.
