"Google", dəniz aləminin ən ağıllı canlılarından olan delfinlərlə ünsiyyəti daha real və mümkün etmək üçün mühüm bir addım atıb.
Yurd.Media xarici mətbuata istinad edərək xəbər verir ki, "Google" "Wild Dolphin Project" təşkilatı ilə birgə, delfinlərin səs siqnallarını analiz və şərh etmək üçün "DolphinGemma" adlı süni intellekt modelini təqdim edib.
"DolphinGemma" modeli, Atlantik okeanında yaşayan ləkəli delfinlərin onilliklər ərzində toplanmış geniş akustik məlumat bazasında öyrədilib. "Google"un açıq mənbəli "Gemma" süni intellekt modelləri və "SoundStream" audio texnologiyası əsasında işləyən bu sistem, "Pixel" smartfonlarında da istifadəyə uyğundur. Bu isə alimlərə sahədə olarkən delfin səslərini birbaşa real vaxtda analiz etmək imkanı yaradır.
Layihə çərçivəsində Corciya Texnologiya İnstitutu tərəfindən hazırlanmış CHAT (Cetacean Hearing Augmentation Telemetry) cihazı da tətbiq edilir. Bu cihaz delfin səslərini yazmaq, dinləmək və süni şəkildə yenidən yaratmaq funksiyasına malikdir.
Tədqiqatçılar ümid edirlər ki, "DolphinGemma" delfinlərin sosial ünsiyyət strukturlarını, fərdi "adlarını" və siqnallarını aşkara çıxaracaq. Gələcəkdə isə bu tədqiqatlar əsasında delfinlərin dili üçün xüsusi bir lüğətin yaradılması planlaşdırılır.
