“Sülh körpüsü” təşəbbüsünün üçüncü konfransı əvvəlki iki konfransdan xeyli böyük idi və burada təkcə təşəbbüs üzvlərinin deyil, həm də Ermənistan və Azərbaycandakı vətəndaş cəmiyyətinin, ekspert və jurnalist icmalarının nümayəndələri iştirak etdilər".
Yurd.Media erməni mətbuatına istinadən xəbər verir ki, bu barədə "Sülh Körpüsü" təşəbbüsünün koordinatoru, "Erməni Şurası" analitik mərkəzinin prezidenti Areq Koçinyan "Sülh Körpüsü" təşəbbüsünün üçüncü konfransına həsr olunmuş mətbuat konfransında bildirib.
Koçinyan bildirib ki, "Sülh Körpüsü" təşəbbüsünün üçüncü konfransına həsr olunmuş mətbuat konfransında açılış nitqi söyləməkdən böyük məmnuniyyət duyuram: "Üçüncü konfrans əvvəlki ikisindən xeyli böyük idi. Təşəbbüsün ilkin üzvlərindən əlavə, hər iki ölkənin vətəndaş cəmiyyətindən, ekspert icmasından və jurnalistlərdən ibarət qrup burada iştirak edib".
"Sülh Körpüsü" təşəbbüsünün koordinatoru və Cənubi Qafqaz Tədqiqat Mərkəzinin direktoru Fərhad Məmmədov yüksək səviyyəli təşkilatçılığa görə Ermənistan tərəfinə və təşkilatçılara təşəkkürünü bildirib.
Onun sözlərinə görə, bu, təşəbbüs çərçivəsində keçirilən üçüncü üzbəüz görüşdür və bu, həm də Azərbaycan nümayəndə heyətinin dövlətlərarası sərhədi keçmək üçün bütün zəruri prosedurlardan keçərək sərhədi piyada keçməsi ilə əlamətdar olub.
"Bu dəfə vətəndaş cəmiyyətindən daha çox nümayəndə dəvət etmək qərarına gəldik. Fəaliyyətimiz eyni vaxtda iki istiqamətdə davam edir. Birincisi, cəmiyyətlərlə işləmək. İkinci istiqamət isə birgə layihələrin həyata keçirilməsidir. Gələcək üçün müəyyən ideyalarımız var. Səmimi bir dialoq qurmuşuq və bunun üçün uyğun mühit və atmosfer yaradılıb", - deyə Fərhad Məmmədov qeyd edib.
Qeyd edək ki, 13-14 fevral tarixlərində Ermənistanda “Sülh körpüsü” təşəbbüsü çərçivəsində ikitərəfli dəyirmi masa keçirilib və bu görüşdə Ermənistan və Azərbaycanın vətəndaş cəmiyyətlərinin nümayəndələri bir araya gəlib. Təşəbbüsün əsas iştirakçılarından əlavə, dəyirmi masada hər iki tərəfdən daha geniş bir qrup da iştirak edib.
Xatırladaq ki, Azərbaycan nümayəndə heyəti bütün müvafiq prosedurlardan keçərək quru sərhədinin demarkasiya olunmuş və işarələnmiş hissəsindən keçərək Ermənistana gəlib. Bu, iki ölkə arasında etimadın möhkəmləndirilməsi istiqamətində atılan vacib praktik addım kimi Ermənistan tərəfindən vurğulanıb.
