Göygöl rayonunun Topalhəsənli kənd məktəbininin tikintisi 6 ildir ki, başa çatmaq bilmir.
Yurd.Media xəbər verir ki, ötən əsrin 30-cu illərində inşa olunmuş məktəb binası uzun müddət xidmət göstərib. Dəfələrlə təmir olunan bina bir neçə il əvvəl tamamilə sökülüb.
Sakinlər "Xəzər Xəbər"-ə bildirib ki, Topalhəsənli kənd məktəbi 6 il əvvəl yenisinin tikintisi məqsədilə sökülüb:
"Bu məktəb 1933-cü ildə tikilib və o vaxtdan bəri fəaliyyət göstərib. 6 il əvvəl sökməyə başladılar, 3-4 ay iş davam elədi. Amma sonra fasilə verdilər və dedilər ki, pul ayrılmayıb".
Məktəbin tikintisinə 1 il əvvəl yenidən başlanılıb, amma proses yarımçıq qalıb. Kənd sakinləri bildirib ki, məktəbdə söküntü işləri başlayandan tədris prosesi Göygöl şəhər 2 nömrəli məktəbə köçürülüb və şagirdlərin daşınması üçün mikro avtobuslar ayrılıb. Prosesin uzanması valideynlərdə narahatlıq yaradır.
Gəncə-Daşkəsən Regional Təhsil İdarəsindən bildirilib ki, məktəbin binasında söküntü işləri 2024-cü il may ayında yekunlaşıb. Şagirdlər həmin dövrdən etibarən təhsillərini Göygöl şəhər 2 nömrəli tam orta məktəbdə davam etdirirlər, onların daşınması xüsusi nəqliyyat vasitəsi ilə təmin edilir. Söküntü işləri təxminən 5 il əvvəl başlayıb və tədricən aparılıb. Ötən il isə tam sökülüb. Yeni binanın 2025-ci ilin sonunadək istifadəyə veriləcəyi planlaşdırılır.
