Bakıda 5 il sonra əmək bazarını gözləyən dəyişikliklər və perspektivlər müzakirə olunub.
Yurd.Media xəbər verir ki, "Gələcəyin Peşələr Sammiti"ndə əmək və əhalinin sosial müdafiəsi naziri Anar Əliyev deyib ki, artan qlobal rəqabət hər bir ölkədən çevik qərarların qəbul edilməsini tələb edir.
Onun sözlərinə görə, qlobal miqyasda baş verən proseslər göstərir ki, süni intellektin sürətli inkişafı, rəqəmsallaşmanın genişlənməsi və avtomatlaşdırmanın yeni mərhələsi dünya əmək bazarının strukturunu köklü şəkildə yenidən formalaşdırır.
"Nəticədə bir çox ənənəvi peşələr yeni məzmun qazanır, əmək resurslarına yönəlik tamamilə fərqli bacarıq profilləri meydana çıxır. Dünya İqtisadi Forumunun 2025-ci ildə dərc olunan "İşlərin Gələcəyi Hesabatı"na əsasən, 2030-cu ilə qədər bugünkü iş yerlərinin 22%-i struktur dəyişikliklərinə məruz qalacaq".
İqtisadiyyat Nazirliyi yanında Kiçik və Orta Biznesin İnkişafı Agentliyinin (KOBİA) İdarə Heyətinin sədri Orxan Məmmədov isə Samittdə çıxışında bildirib ki, 2030-cu ilə qədər yeni qlobal makro-meyillər nəticəsində 170 milyon yeni iş yeri yaradılacaq.
Onun sözlərinə görə, kadrların peşəkar hazırlığı səviyyəsi iqtisadiyyatların gələcək çağırışlara hazır olması baxımından vacibdir: "Ümumdünya İqtisadi Forumunun hesabatına əsasən, 2030-cu ilə qədər yeni qlobal makro-meyillər nəticəsində 170 milyon yeni iş yeri yaradılacaq. Bu dövrdə texnoloji inkişaf, yaşıq keçid, iqtisadi və demoqrafik dəyişiklər fonunda qlobal əmək bazarı əhəmiyyətli dəyişikliyə məruz qalacaq. . Qeyd edilən meyllər, həmçinin, 92 milyon işlərin itməsinə gətirib çıxaracaq".
O qeyd edib ki, generativ süni intellekt texnologiyalarının təsiri altında 2030-cu ilə qədər işçi qüvvəsinin baza bilik və bacarıqlarının 40 %-ə yaxın həcmində dəyişikliyə məruz qalacağı gözlənilir.
