Bahar fəslində havada artan polen miqdarı göz allergiyalarının sayının artmasına gətirib çıxarır.
Yurd.Media xəbər verir ki, sahə mütəxəssisləri vaxtında müdaxilə edilmədikdə bu vəziyyətin ciddi görmə pozğunluqlarına yol aça biləcəyi barədə xəbərdarlıq ediblər.
Türkiyəli oftalmoloq Adnan İpçioğlu açıqlayıb ki, bu əlamətlər güman edildiyi qədər təhlükəsiz deyil. Mütəxəssisin fikrincə, xüsusilə göz qaşıntısı ən əhəmiyyətli risk amillərindən birini təşkil edir.
Həkim vurğulayıb ki, allergik reaksiya zamanı gözləri qaşımaq buynuz qişanın (korneanın) strukturuna zərər verə bilər və bu proses görmə qabiliyyətinin itirilməsinə gətirib çıxaran keratokonus xəstəliyinin inkişafına şərait yarada bilər.
Bununla yanaşı, günəş şüalarının da allergiya əlamətlərini daha da şiddətləndirdiyi qeyd olunub. Ultrabənövşəyi şüalar gözlərdə yanma və qızartını artıraraq narahatlıq hissini dərinləşdirir.
Mütəxəssis əlavə edib ki, başlanğıc mərhələdə sadə müalicə üsulları ilə idarə edilə bilən allergiya, diqqətsiz yanaşma nəticəsində xroniki formaya keçə və daha intensiv dərman terapiyası tələb edə bilər:
"Adi bir qaşıntı belə korneanın quruluşunu pozaraq nəticədə görmə itkisinə səbəb olan keratokonusun yaranmasına gətirib çıxara bilər".
Qeyd edək ki, mütəxəssislər gözlərdə hər hansı narahatlıq hissi meydana gəldikdə dərhal oftalmoloja müraciət etməyi məsləhət görür, belə ki, erkən müdaxilə görmə sağlamlığının qorunmasında həlledici əhəmiyyət daşıyır.
