Enerji içkiləri maddələr mübadiləsinə, sinir sisteminə və ürək-damar sisteminə zərərli təsir göstərir.
Yurd.Media xəbər verir ki, bu içkilər şəkərli diabet, piylənmə, ateroskleroz kimi ciddi xəstəliklərin yaranmasına gətirib çıxara və yaşlanma prosesini sürətləndirə bilər.
Bu haqda diyetoloq, psixoterapevt, professor Mixail Qinzburq açıqlama verib.
"Enerji içkiləri üç fundamental istiqamətdə risk daşıyır: ürək-damar və sinir sisteminə neqativ təsir göstərir, eləcə də maddələr mübadiləsini pozaraq şəkərli diabetin yaranma ehtimalını artırır. Bu içkilər xüsusən yeniyetmə yaş qrupunda böyük təhlükə törədir. Yeniyetmələrin ürək-damar sistemi hələ tam inkişafını başa çatdırmayıb və bu səbəbdən enerji içkilərinə olduqca həssas reaksiya verə bilərlər - belə ki, ürək ritminin artması və qan təzyiqinin yüksəlməsi müşahidə oluna bilər. Bu cür təsir ürək-damar sistemi üçün kifayət qədər ciddi nəticələrə gətirib çıxara bilər", - deyə Qinzburq qeyd edib.
Enerji içkilərinin tərkibində yüksək həcmdə şəkər olması onların ifrat istehlakını əlavə təhlükəyə çevirir.
"Qida rasionunda şəkərin həddən artıq miqdarı yaşlanma prosesini sürətləndirir, şəkərli diabet, ateroskleroz kimi metabolik xəstəliklərə, habelə ağız boşluğu ilə bağlı problemlərə gətirib çıxara bilər. Enerji içkilərindəki şəkər orqanizm tərəfindən çox tez mənimsənilir ki, bu da onun zərərli effektini daha da gücləndirir. Kofeinin beyin funksiyalarına göstərdiyi təsir isə insanlarda həyəcan hissi və yuxu pozğunluqlarına yol aça bilər", - ekspert vurğulayıb.
Qeyd olunur ki, mütəxəssislər dörd və daha çox qutuda enerji içkisinin qəbulunun ölümlə nəticələnə biləcəyi barədə ciddi xəbərdarlıq edirlər.
