"WhatsApp"ın keçmiş təhlükəsizlik xidməti rəhbəri Attaulla Bayq, Meta korporasiyasına qarşı iddia qaldırıb və bildirib ki, onu mesencerdəki kritik zəiflikləri ifşa etdiyinə görə işdən çıxarıblar. Onun sözlərinə görə, bu çatışmazlıqlar ABŞ qanunvericiliyini poza və səhmdarları aldada bilərdi.
Yurd.Media xəbər verir ki, bu barədə "The Register" nəşri məlumat verib. Şimali Kaliforniyada təqdim edilmiş iddia ərizəsinə görə, Bayq onun fikrincə Sarbanes-Oxley Qanunu və SEC-in daxili nəzarət qaydalarına zidd olan problemlər barədə məlumat verib.
O iddia edir ki, onun xəbərdarlıqlarına cavab olaraq, işdən çıxarılması üçün zəmin hazırlamaq məqsədilə onun performans qiymətləndirmələrini qəsdən aşağı salıblar. Bayqın göstərdiyi əsas problemlər arasında: istifadəçi məlumatlarının lazımi uçotu və inventarizasiyasının olmaması, təxminən 1,5 min mühəndisin məxfi məlumatlara sərbəst girişi, məlumat sızmalarını izləmək üçün monitorinq sistemlərinin olmaması, həmçinin hər gün yüz minlərlə hesabın ələ keçirilməsi halları var idi.
Bayq iddia edir ki, hələ 2022-ci ildə "WhatsApp" rəhbərliyinə mümkün pozuntular və kibertəhlükəsizlik hesabatlarının saxtalaşdırılması cəhdləri barədə məlumat verib. Həmin ilin payızında o, Qiymətli Kağızlar və Birjalar Komissiyasına şikayət göndərib və 2025-ci ilin fevralında əmək müqaviləsinin ləğv edilməsi barədə bildiriş alıb.
Meta korporasiyası öz növbəsində bütün ittihamları qəti şəkildə rədd edir. "WhatsApp"ın kommunikasiya üzrə vitse-prezidenti Karl Vuq (Carl Woog) verdiyi şərhdə bunun "tipik ssenari" olduğunu bildirib, burada qeyri-qənaətbəxş nəticələrə görə işdən çıxarılan əməkdaş "təhrif olunmuş ittihamlarla ictimaiyyətin diqqətini cəlb etməyə çalışır" sözlərini deyib. Şirkət təhlükəsizlik və məxfiliyin onun əsas prioritetləri olaraq qaldığını vurğulayır. İrəli sürülən ittihamların miqyası və ciddiliyini nəzərə alaraq, məhkəmə prosesi Meta üçün "adi əmək mübahisəsi"ndən daha ciddi nəticələrə səbəb ola bilər.
