Hesablama Palatası “Azərbaycan Televiziya və Radio Verilişləri” QSC-nin (AzTV) işçilərinin sosial təminat hüquqlarını məhdudlaşdırdığını müəyyən edib.
Yurd.Media xəbər verir ki, bu barədə Palatanın "2026-ci il dövlət büdcəsi haqqında" qanun layihəsinə verdiyi rəydə bildirilir.
Belə ki, audit nəticəsində səhmdar cəmiyyətinin işçilərinə əmək haqqı kimi ödəməli olduğu vəsaitləri qonorar adı ilə rəsmiləşdirdiyi, ümumilikdə 26 milyon manat, o cümlədən 2023-cü ildə 11,3 milyon manat, 2024-cü ildə 11,6 milyon manat, 2025-ci ilin I rübündə 3,1 milyon manat ödəniş etdiyi müəyyən edilib.
Bu, əmək münasibətlərinin mülki-hüquq münasibətləri kimi yanlış təsnif edilərək Əmək Məcəlləsi və Vergi Məcəlləsinin şərtləri ilə uyğunsuzluqlara səbəb olub, nəticə etibarilə məcburi sosial ayırmaların tam tutulmaması işçilərin sosial təminat hüquqlarının məhdudlaşdırılması ilə səciyyələnib.
