Azərbaycanda kreditləşmə sahəsində çoxdan gözlənilən yeni xidmət istifadəyə verilib.
Bu barədə Yurd.Media-ya "Azərbaycan Kredit Bürosu" (AKB) MMC-dən bildirilib.
Məlumata görə, söhbət rəqəmsal kredit tarixçəsi platforması olan "Findoc" portalındakı (Portal) "Stop-Kredit" xidmətindən gedir.
O, vətəndaşlara öz adlarına rəqəmsal kanallar vasitəsilə məsafədən istehlak kreditlərinin rəsmiləşdirilməsinə və yaxud mövcud kredit limitlərinin artırılmasına könüllü məhdudiyyət (özünəqadağa) tətbiq etmək imkanı yaradır.
"Stop-Kredit" xidmətini vətəndaşlar Portal üzərindən ləğv etmək və yaxud yenidən aktivləşdirmək imkanına malikdirlər.
Portal real-vaxt rejimində, 7/24 əsaslarla fəaliyyət göstərir və hazırda Portalda qeydiyyatdan keçmiş şəxslərin sayı 225 mindən artıqdır.
