2024-cü ilin sentyabrında mən işlədiyim digər federasiyalardakı layihələrin bənzəri olan, üzərində lazımi korrektələr edilmiş kompleks plan təqdim etdim.
Yurd.Media Sportnet.az-a istinadən xəbər verir ki, bunu Azərbaycan milli komandasının baş məşqçi postundan istefaya göndərilən Fernandu Santuş yaydığı vida müraciətində deyib.
"Ümidvaram ki, bu layihə AFFA-ya faydalı olacaq və gələcəkdə yaxşı nəticələrin əldə olunmasına imkan verən futbol istedadlarının tərbiyə və inkişafına lazımi investisiyaların qoyulmasında stimul rolunu oynayacaq", - portuqaliyalı mütəxəssis bildirib.
71 yaşlı mütəxəssisin müraciətində AFFA prezidenti Rövşən Nəcəfə, habelə, Azərbaycan xalqına bu dövrdə göstərdiyi qonaqpərvərlik və hörmətinə təşəkkür edib.
O qeyd edib ki, 2024-cü ilin iyununda federasiyanın qarşıya qoyduğu məqsəd AVRO-2028-in seçmə mərhələsi üçün rəqabətədavamlı komandanın hazırlanması, bu məqsədilə ölkənin futbol bazasının, o cümlədən, yarış strukturu və məşq prosesinin texniki və infrastruktur restrukturizasiyası ilə bağlı olmuşdu.
Qeyd edək ki, Fernandu Santuş AFFA rəhbərliyi ilə qarşılıqlı razılaşma əsasında istefaya göndərilib.
