Hacıqabul rayonundakı restoranda son iki ayda ikinci dəfədir ki, quşların qanunsuz saxlanılması aşkarlanıb.
Yurd.Media xəbrə verir ki, Pirsaat qəsəbəsində yerləşən “Fədək” restoranında baytarlıq nəzarəti olmadan saxlanılan quşlar aşkar olunaraq aidiyyəti qurumlara təhvil verilib.
Bu Qida Təhlükəsizliyi Agentliyinin (AQTA) əməkdaşlarının epizootoloji komissiya ilə birgə keçirdiyi monitorinq zamanı məlum olub.
Qeyd olunur ki, təhlükəli xəstəliklərin yayılmasının qarşısının alınması və biotəhlükəsizlik tələblərinə riayət olunması məqsədilə aparılan yoxlama zamanı quşlara baytar həkim tərəfindən kliniki baxış keçirilib. Daha sonra ərazi dezinfeksiya, dezinseksiya və deratizasiya olunaraq müvafiq tədbirlər icra edilib.
Xatırladaq ki, 2 ay əvvəl də həmin restoranda oxşar nöqsanlar aşkarlanmışdı, quşların saxlandığı yerlərdə təmizlənmə, dezinfeksiya və digər baytarlıq-sanitariya tədbirlərinin görülməsi ilə bağlı tapşırıqlar verilmişdi.
