Bəzi ərazilərdə qaz təchizatında müvəqqəti fasilə olacaq.
Yurd.Media xəbər verir ki, 8 may 2025-ci il tarixində saat 09:00-dan etibarən bir sıra ərazilərdə qaz təchizatında məhdudiyyətlər olacaq.
"Azəriqaz" İstehsalat Birliyinin məlumatına görə, fasilə Qaradağ rayonu, Sahil qəsəbəsini təbii qazla təmin edən xəttin təmiri, "Qaradağ-Sumqayıt" magistral qaz kəmərində sızmanın aradan qaldırılması, yeni çəkilmiş xəttin şəbəkəyə qoşulması və siyirtmənin təmiri ilə əlaqədardır.
Bu səbəbdən Sahil qəsəbəsinin tam, Sumqayıt şəhərinin isə bir hissəsinin (Qaçqın şəhərciyi və 5 sənaye müəssisəsi) qaz təchizatı müvəqqəti dayandırılacaq.
Bundan əlavə, Naxçıvan Qaz İstismar Xidmətindən bildirilib ki, 219 mm-lik borunun korroziyaya uğraması səbəbilə yeraltı xətlər yerüstü xətlərlə əvəzlənəcək. Bu səbəbdən 8 may tarixində saat 09:00-dan etibarən Babək rayonunun Babək şəhəri, Qoşadizə kəndi, N saylı hərbi hissə və Naxçıvan hava limanında da qaz verilişi müvəqqəti olaraq dayandırılacaq.
Təmir işləri başa çatdıqdan sonra qaz təchizatı bərpa olunacaq.
