Demensiya (zehni geriləmə), insult və depressiya riskinə təsir edən əsas amillər araşdırılıb.
Yurd.Media xəbər verir ki, yeni araşdırma göstərib ki, bəzi həyat tərzi dəyişiklikləri insanlarda demensiya, insult və yaşla bağlı depressiya riskini azalda bilər.
Dünyada 55 milyondan çox insan bu xəstəliklərdən əziyyət çəkir və bu rəqəmin 2050-ci ilə qədər üç dəfə artacağı gözlənilir.
ABŞ-ın Massaçusets ştatındakı tədqiqatçılar tərəfindən aparılan və “Nevrologiya, Neyrocərrahiyyə və Psixiatriya” jurnalında dərc olunan araşdırmaya əsasən, bu üç xəstəliyin qarşısını almaqda 17 risk amili mühüm rol oynayır.
Araşdırma nəticəsində müəyyən olunub ki, bu risk amillərinin aradan qaldırılması hər 3 xəstəliyin riskini minimuma endirir:
1. Qan təzyiqi
2. Bədən çəkisi
3. Böyrək xəstəliyi
4. Qan şəkəri
5. Xolesterin miqdarı
6. Alkoqol istifadəsi
7. Pəhriz
8. Eşitmə itkisi
9. Ağrı
10. Fiziki hərəkətsizlik
11. Həyatda məqsədyönlük hissi
12. Yuxu rejimi
13. Siqaret çəkmək
14. Sosial əlaqələrin zəifliyi
15. Stress
16. Zehni məşğuliyyət azlığı
17. Depressiv əlamətlər
Ən güclü təsir edən amil kimi yüksək qan təzyiqi göstərilib. Qan təzyiqi 140/90 mm Hg və ya daha yüksək olan insanlarda insult riski iki dəfə, demensiya riski 20%, depressiya riski isə 16% daha çoxdur.
Mütəxəssislər bildirir ki, bu amillərin bəzilərini eyni anda yaxşılaşdırmaq mümkündür. Məsələn, düzgün pəhriz və müntəzəm fiziki fəaliyyət həm çəkini, həm qan təzyiqini, həm də şəkər səviyyəsini normallaşdıra bilər.
Tədqiqatçılar həmçinin "Beyin Baxımı Hesabı" adlı bir qiymətləndirmə vasitəsi hazırlayıblar. Bu sistem insanların beyin sağlamlığı ilə bağlı risklərini izləməyə və azaldmağa kömək edir.
Mütəxəssislər sağlam həyat tərzinin bu üç xəstəliyin qarşısının alınmasında ən təsirli yol olduğunu vurğulayırlar.
