Ağdamın "Qarabağ" klubu İspaniyanın Bilbao şəhərindən əliboş qayıdıb.
Yurd.Media xəbər verir ki, UEFA Çempionlar Liqasının əsas mərhələsinin III turunda "Atletik" (Bilbao) ilə matçda "Qarabağ" hesabı açıb. 1-ci dəqiqədə Leandro Andrade fərqlənib.
"San Mames" stadionundakı oyunun birinci hissəsinin sonlarında ev sahibləri hesabı bərabərləşdirib - 1:1. 40-cı dəqiqədə Qorka Quruseta adını tabloya yazdırıb.
Görüşün ikinci hissəsində "Atletik" hesabda irəli çıxıb. 70-ci dəqiqədə Robert Navarro fərqlənib - 2:1.
Oyunun sonlarında meydan sahibləri hesabdakı üstünlüklərini bir qədər də möhkəmləndiriblər.
88-ci dəqiqədə Qorka Quruseta dubl müəllifi olub - 3:1.
Qeyd edək ki, Azərbaycan çempionu Liqa mərhələsinin I turunda Portuqaliyada "Benfika"nı 3:2 hesabı ilə üstələyib. "Köhlən atlar" II turda Bakıda Danimarka təmsilçisi "Kopenhagen"ə qalib gəlib - 2:0.
