Avtomobil bazarında üstünlük qazanan Çin istehsalı maşınlarda ciddi ucuzlaşma qeydə alınıb.
Yurd.Media-nın Xəzər TV-yə istinadən məlumatına görə, elan saytlarında son iki ayda bu avtomobillərin qiymətində 4 min manata yaxın eniş müşahidə edilir.
Məsələ ilə bağlı nəqliyyat eksperti Yasin Mustafayev bildirib ki, hazırda ölkəyə gətirilən Çin avtomobillərinin 70 faizdən çoxu qeyri-rəsmi idxalçıların payına düşür. Yalnız 30 faizi isə rəsmi dilerlər vasitəsilə, birbaşa zavoddan və zəmanətlə satılır. Onun sözlərinə görə, qeyri-rəsmi idxalçılar arasında rəqabət artdığı üçün qiymətlərdə gündən-günə eniş baş verir.
Ekspert əlavə edib ki, belə avtomobillərə zəmanət təqdim olunmur. Bu səbəbdən də hər hansı zavod qüsuru və ya nasazlıq yarandıqda xərcləri avtomobil sahibi özü ödəməli olur.
