AFB Bankın Mikro və Aqro Kreditlər Departamentinin direktoru Aslan Nəbiyev bankın mikro, aqro və KOS kreditləşməsi istiqamətində əldə etdiyi nəticələr, rəqəmsallaşma, regionlarda sahibkarların maliyyələşdirilməsi və qarşıdakı dövr üçün əsas hədəflər barədə danışıb.
Aslan Nəbiyev: “Biz yalnız kredit verən maliyyə qurumu olmağa deyil, sahibkarın inkişaf yolunda strateji tərəfdaşına çevrilməyə çalışırıq. Fermerin tarlada, sahibkarın biznesində qazandığı hər uğur bizim üçün də uğurdur.”
– AFB Bankın Mikro və Aqro Kreditlər Departamentinin əsas missiyası nədən ibarətdir?
– Əsas missiyamız mikro sahibkarların, fermerlərin, eləcə də kiçik və orta biznes subyektlərinin maliyyə resurslarına çıxış imkanlarını genişləndirmək və onların davamlı inkişafına dəstək olmaqdır. Biz bu istiqamətə yalnız kreditləşmə kimi yanaşmırıq. Məqsədimiz sahibkarın fəaliyyətini genişləndirməsinə, yeni imkanlardan istifadə etməsinə, fermerin isə mövsümi və investisiya ehtiyaclarını vaxtında qarşılaya bilməsinə şərait yaratmaqdır.
AFB Bank olaraq mikro, aqro və KOS istiqamətini inkişaf potensialı yüksək olan əsas biznes sahələrindən biri kimi görürük. Xüsusilə regionlarda sahibkarlığın maliyyələşdirilməsi həm bankın inkişaf strategiyası, həm də real sektorun dəstəklənməsi baxımından bizim üçün xüsusi əhəmiyyət daşıyır.
– Son dövrdə bu istiqamətdə hansı nəticələr əldə olunub?
– Son bir ildən bir qədər artıq müddətdə kifayət qədər ciddi dinamika əldə etmişik. Mikro və aqro kreditlər üzrə kredit portfelimizi 70 milyon manata çatdırmışıq. Hesab edirəm ki, bu göstərici bir tərəfdən bazarda mövcud olan böyük potensialı, digər tərəfdən isə sahibkarların və fermerlərin AFB Banka olan etimadını göstərir.
Bizim üçün portfelin böyüməsi ilə yanaşı, onun arxasında dayanan müştəri bazasının genişlənməsi də önəmlidir. Hər yeni maliyyələşdirilən biznes yeni iş yerləri, əlavə istehsal imkanları və regionlarda iqtisadi fəallığın artması deməkdir. Buna görə də nəticələrimizi yalnız kredit portfelinin həcmi ilə ölçmürük.
– Aqrar sektor AFB Bank üçün nə dərəcədə prioritet istiqamətdir?
– Aqrar sektor bizim üçün xüsusi əhəmiyyət daşıyır. Azərbaycanda regionların iqtisadi inkişafında kənd təsərrüfatının rolu böyükdür və fermerlərin maliyyələşməyə vaxtında çıxışı onların fəaliyyətinin davamlılığına birbaşa təsir göstərir.
Bu il təxminən 2 500 pambıqçı fermerin kreditləşməsini həyata keçirmişik. Bu, kifayət qədər böyük miqyasdır və aqrar sektorda fəaliyyətimizi daha da genişləndirmək niyyətimizi göstərir.
Eyni zamanda, fermerlərin və sahibkarların daha sərfəli maliyyə imkanlarından istifadə etməsi üçün güzəştli kredit proqramlarının icrasında fəal iştirak edirik. Burada əsas məqsəd yalnız maliyyə təqdim etmək deyil, sahibkar üçün mümkün qədər əlverişli və onun fəaliyyət modelinə uyğun maliyyələşmə mexanizmi yaratmaqdır.
– Bankın mikro və kiçik sahibkarlar üçün hansı maliyyələşmə imkanları mövcuddur?
– Müştərilərimizin biznes ölçüsü və maliyyə ehtiyacları fərqli olduğu üçün məhsullarımızı da buna uyğun formalaşdırmışıq. Hazırda 100 min manata qədər mikrokreditlər, kiçik və orta sahibkarlıq subyektləri üçün isə 1 milyon manata qədər KOS kreditləri təqdim edirik.
Bu imkanlardan həm fəaliyyətə yeni başlayan sahibkarlar, həm dövriyyə vəsaitinə ehtiyacı olan bizneslər, həm də mövcud fəaliyyətini genişləndirmək və yeni investisiyalar həyata keçirmək istəyən müəssisələr yararlana bilirlər.
Burada bizim üçün vacib məqam odur ki, sahibkarın ehtiyacını düzgün anlayaq. Bəzən biznesin inkişafı üçün böyük məbləğ deyil, məhz doğru zamanda əldə edilən maliyyə resursu həlledici rol oynayır.
– Son zamanlar bank sektorunda rəqəmsallaşma əsas mövzulardan biridir. AFB Bank mikro kreditləşmədə hansı yenilikləri tətbiq edib?
– Son dövrdə əldə etdiyimiz ən mühüm nəticələrdən biri məhz mikrokreditlərin rəqəmsallaşdırılmasıdır. Artıq sahibkarın kredit əldə etmək üçün mütləq şəkildə banka və ya filiala yaxınlaşmasına ehtiyac yoxdur. Müştəri müraciətini onlayn şəkildə həyata keçirərək mikrokredit əldə edə bilir.
Bu, xüsusilə regionlarda fəaliyyət göstərən sahibkarlar üçün ciddi üstünlükdür. Sahibkar öz biznesindən ayrılmadan, əlavə vaxt və yol xərci sərf etmədən maliyyələşmə imkanından yararlana bilir.
AFB Bankda rəqəmsallaşmaya sadəcə proseslərin elektron formaya keçirilməsi kimi baxmırıq. Məqsədimiz kredit əldə etmə prosesini daha sürətli, daha rahat və daha əlçatan etməkdir. Qarşıdakı mərhələlərdə də mikro və aqro kreditləşmə proseslərində rəqəmsal imkanların genişləndirilməsi əsas prioritetlərimizdən olacaq.
– Regionlarda fəaliyyət göstərən sahibkarlarla bağlı bankın yanaşması necədir?
– Bizim əsas hədəflərimizdən biri məhz Bakı ilə məhdudlaşmadan ölkənin bütün regionlarında fəaliyyət göstərən sahibkarlara çatmaqdır. Regionlarda çox böyük sahibkarlıq potensialı var. Fermerlər, ailə biznesləri, mikro sahibkarlar və müxtəlif sahələrdə çalışan kiçik müəssisələr üçün maliyyə resurslarına çıxış biznesin inkişafında əsas amillərdən biridir.
Bu baxımdan həm fiziki xidmət kanallarının, həm də rəqəmsal kredit imkanlarının paralel inkişafı bizim üçün vacibdir. Rəqəmsal mikrokredit məhsulumuz bu strategiyanın əsas elementlərindən biridir. Müştərinin harada fəaliyyət göstərməsindən asılı olmayaraq AFB Bankın maliyyə xidmətlərinə rahat çıxışını təmin etmək istəyirik.
– Mikro və aqro kreditləşmədə sürətli artım kredit risklərinin idarə olunmasını daha vacib etmir ki?
– Əlbəttə. Portfelin böyüməsi bizim üçün heç vaxt təkbaşına məqsəd olmayıb. Kreditləşmədə davamlı inkişaf üçün düzgün risk qiymətləndirilməsi və müştərinin real maliyyə imkanlarının nəzərə alınması vacibdir.
Biz sahibkarın biznes modelinə, pul axınlarına və kredit öhdəliyini qarşılamaq imkanlarına əsaslanan yanaşmaya üstünlük veririk. Məqsəd müştəriyə sadəcə mümkün olan ən yüksək məbləğdə kredit təqdim etmək deyil, onun biznesinin daşıya biləcəyi və inkişafına real töhfə verəcək maliyyələşmə modelini müəyyən etməkdir.
Uzunmüddətli əməkdaşlığın əsası da məhz budur. Müştərinin biznesi sağlam inkişaf etdikdə bankla əməkdaşlığı da davamlı olur.
– Sahibkarların kreditlə bağlı ən çox hansı gözləntiləri var?
– Sahibkar üçün əsas məsələlərdən biri vaxtdır. Biznesdə fürsətlər bəzən çox qısa müddət ərzində yaranır və həmin anda maliyyəyə çıxış mümkün deyilsə, sahibkar bu fürsəti itirə bilər. Buna görə müştərilər sürətli qərar, rahat müraciət prosesi və aydın kredit şərtləri gözləyirlər.
Biz də proseslərimizi məhz bu gözləntilərə uyğun inkişaf etdiririk. Mikrokreditlərin rəqəmsallaşdırılması bunun ən yaxşı nümunələrindən biridir. Növbəti mərhələdə məqsədimiz texnologiyadan daha geniş istifadə etməklə kreditləşmə prosesini daha da sadələşdirmək və qərarvermə müddətini optimallaşdırmaqdır.
– Qarşıdakı dövr üçün AFB Bankın mikro və aqro kreditləşmə üzrə əsas hədəfləri nələrdir?
– Əsas hədəfimiz daha geniş müştəri auditoriyasına çatmaqdır. Ölkənin bütün regionlarında fəaliyyət göstərən mikro sahibkarları, fermerləri və KOS subyektlərini maliyyə xidmətlərimizə cəlb etmək, onların uzunmüddətli və etibarlı maliyyə tərəfdaşına çevrilmək istəyirik.
Bununla yanaşı, kredit portfelinin sağlam və davamlı böyüməsini, rəqəmsal məhsulların inkişafını, aqrar sektorda fəaliyyətimizin genişləndirilməsini və sahibkarların ehtiyaclarına uyğun yeni maliyyə həllərinin yaradılmasını planlaşdırırıq.
AFB Bankın bu istiqamətdə ambisiyası kifayət qədər böyükdür. Biz mikro və aqro biznesini bankın gələcək inkişafında mühüm istiqamətlərdən biri kimi görür və burada uzunmüddətli mövqe formalaşdırmaq istəyirik.
– Sonda sahibkarlara və fermerlərə hansı mesajı vermək istərdiniz?
– Biz yalnız kredit verən maliyyə qurumu olmağa deyil, sahibkarın inkişaf yolunda strateji tərəfdaşına çevrilməyə çalışırıq. Çünki bizim üçün maliyyələşdirmənin əsas nəticəsi verilən kreditin özü deyil, həmin vəsait hesabına yaradılan dəyərdir.
Fermerin tarlada əldə etdiyi nəticə, sahibkarın biznesini böyütməsi, yeni iş yeri yaratması və fəaliyyətini genişləndirməsi bizim üçün də uğurdur.
AFB Bank olaraq istəyirik ki, sahibkar maliyyəyə ehtiyac yarandığı anda bankı sadəcə kredit mənbəyi kimi deyil, onun biznesini anlayan və inkişafında yanında olan etibarlı tərəfdaş kimi görsün.
