Bloomberg: Çinin Quandun əyalətində Çikunqunya virusu səbəbindən məhdudiyyətlər tətbiq edilib.
Çinin Quandun əyalətinin hakimiyyəti əvvəllər COVID-19 pandemiyası zamanı istifadə olunan sanitariya tədbirlərini qismən bərpa edib. Bloomberg-in məlumatına görə, bu tədbirlər çikunqunya virusunun yayılması ilə mübarizəyə yönəlib. İndi apteklərdə xəstəliyin simptomlarını yüngülləşdirən dərmanları alarkən sənəd təqdim etmək tələb olunur. Alıcılar haqqında məlumat yoluxma hallarının qeydiyyatı üçün sanitariya xidmətlərinə ötürülür. Koronavirus pandemiyası zamanı belə məlumat toplanması xəstələrin hərəkətini məhdudlaşdırmağa və test keçmə prosesini nəzarətdə saxlamağa kömək edirdi.
Çikunqunya virusu ağcaqanad dişləməsi ilə ötürülür. Xəstəliyin simptomları yoluxmadan bir neçə gün sonra ortaya çıxır və temperaturun qəfil 40°C-yə qədər yüksəlməsi, aylarca davam edə bilən güclü oynaq ağrıları, əzələ və baş ağrıları, ürəkbulanma, zəiflik və səpkiləri əhatə edir. Hazırda yağış mövsümünün davam etdiyi və isti havanın olduğu Quandunda virusu daşıyan ağcaqanadların çoxalması üçün əlverişli şərait yaranıb. Təkcə Foşan şəhərində son ay ərzində 7 mindən çox yoluxma halı qeydə alınıb.
Hələlik əyalət hakimiyyətinin ciddi lokdaun tətbiq etmək planları barədə məlumat yoxdur, lakin Quandundan kənarda bəzi şəhərlər artıq Foşandan gələnlər üçün məhdudiyyətlər qoyub. Onlara iki həftə ərzində öz sağlamlıq vəziyyətlərini diqqətlə izləmək və xəstəliyin ilk əlamətləri zamanı həkimə müraciət etmək tövsiyə olunur.
ABŞ-ın Xəstəliklərə Nəzarət və Profilaktika Mərkəzləri də Çinə səyahət edən vətəndaşlar üçün xəbərdarlıq yayımlayaraq, onlara ağcaqanad dişləmələrinə qarşı ehtiyat tədbirləri görmələrini tövsiyə edib.
