Yağan intensiv yağışlar nəticəsində şimal bölgəsində, xüsusilə Quba və Xaçmaz rayonlarında çaylarda suyun səviyyəsi kəskin artıb.
Yurd.Media "İctimai TV"-yə istinadən xəbər verir ki, Qubada Qaraçay Qudyal və Vəlvələ çaylarının yataqları genişlənərək ətrafdakı evlər və təsərrüfat sahələri üçün sel təhlükəsi yaradıb.
Qubanın bəzi kəndlərində nəqliyyatın hərəkətində problemlər müşahidə olunur. Artıq Qaraçay körpüsündə təmir-bərpa işlərinə bitib və istifadəyə verilib.
Xaçmaz rayonunun Xaspoladoba kəndində də oxşar vəziyyət yaşanır. Avtomobil körpüsünün qəzalı vəziyyətə düşməsi nəticəsində yeddi kəndin rayon mərkəzi ilə əlaqəsi çətinləşib. Əraziyə Fövqəladə Hallar Komissiyası baxış keçirib, bir ailə müvəqqəti olaraq çadıra köçürülüb, çayın istiqaməti dəyişdirilib. Qabaqlayıcı tədbirlər çərçivəsində ərazilərə texnika cəlb olunub, çay məcraları təmizlənib və mövcud infrastruktura nəzarət gücləndirilib.
