Mənzil İnşaatı Dövlət Agentliyi (MİDA) Yevlax şəhərindəki yaşayış kompleksinin tikintisi davam edir.
"Yurd.Media" xəbər verir ki, artıq çoxmənzilli yaşayış binalarının tikintisi ilə əlaqədar mühəndis-kommunikasiya şəbəkəsinin tikintisi, ərazinin abadlaşdırılması və yaşıllaşdırılması işlərinə başlanılacaq.
Məlumata görə, MİDA sözügedən işlərin icrasını “Enerji Qrup” MMC-yə həvalə edib və müqavilə bağlayıb.
Müqaviləyə əsasən, mühəndis-kommunikasiya şəbəkəsinin tikintisi, ərazinin abadlaşdırılması və yaşıllaşdırılması işləri 5 318 197,53 manata başa gələcək.
Qeyd edək ki, Yevlax Yaşayış Kompleksi Yevlax şəhəri, Rəşad Budaqov küçəsində yerləşir. Yaşayış kompleksinin ümumi sahəsi 1,9 hektar təşkil edir.
Yaşayış kompleksi 7 mərtəbəli olmaqla 6 binadan ibarətdir. Bu binalarda ümumilikdə 329 mənzil olacaq ki, onlardan 14-nün studio tipli, 28-nin birotaqlı, 84-nün ikiotaqlı, 139-nun üçotaqlı, 64-nün dördotaqlı olması nəzərdə tutulur. Studio tipli mənzillərin sahəsi təqribən 43,10 - 43,46 m2, birotaqlı mənzillərin sahəsi 45,43 - 45,45 m2, ikiotaqlı mənzillərin sahəsi 58,57 - 86,63 m2, üçotaqlı mənzillərin sahəsi 73,93 - 98,06 m2, dördotaqlı mənzillərin sahəsi 102,38 - 129,15 m2 təşkil edəcək.
Bütün mənzillər tam təmirli və mətbəx mebeli ilə təchiz olunmuş vəziyyətdə vətəndaşlara təklif olunacaq. Yaşayış binaları ilə yanaşı ərazidə sakinlər üçün istirahət guşələri yaradılacaq.
