İpoteka və Kredit Zəmanət Fondu "Azərmaş Group" MМС-nin "Bakı Fond Birjası" (BFB) QSC-də yerləşdirmək istədiyi 10 milyon manatlıq faizli, sənədsiz, adlı istiqrazın 6 milyon manatlıq hissəsinə dövlət zəmanəti verib.
Bu barədə Yurd.Media-ya Fonddan bildirilib.
Başqa sözlə, yerli avtomobil istehsalçısı istiqraz emissiyası hesabına əldə edəcəyini vəsaiti vaxtında investorlara geri qaytara bilməsə, onun borcunun 60%-ni dövlət ödəyəcək.
Bu, Azərbaycanda korporativ istiqrazlara dövlət zəmanətinin verilməsi ilə bağlı ilk haldır.
Xatırladaq ki, hər birinin nominal dəyəri 1 000 manat olan 10 000 ədəd istiqraz kütləvi təklif üsulu ilə yerləşdiriləcək və 3 il tədavüldə olacaq.
Onlara illik 13% gəlirlilik vəd olunub. Faizlər 3 aydan bir ödəniləcək. Yerləşdirmə üzrə anderrayter "PAŞA Kapital İnvestisiya Şirkəti" QSC-dir.
Hərracın tarixi hələ açıqlanmayıb.
