Xankəndidə yeni açılan "Tamstore" marketində məhsulların vitrindəki qiymətləri ilə kassadakı qiymətlər arasında nəzərə çarpacaq fərqlər aşkar olunub.
Yurd.Media xəbər verir ki, jurnalist Şamxal Adigözəlov sosial media hesabında qeyd edib ki, alış-veriş zamanı vitrində 0.38 manat olaraq qeyd olunan yerfındığı kassada 1.24 manat olaraq hesablanıb:
"Məsələni kassada araşdırarkən digər bir vətəndaşın da eyni problemlə üzləşdiyinin şahidi oldum. Başqa bir müştəri isə vitrinində 7.40 manat olaraq göstərilən 2 litrlik “Xırdalan” pivəsinin kassadan 8 manatdan baha olaraq keçdiyini bildirirdi və haqlı narazılığını ifadə edirdi.
Təəssüf ki, gündəlik alış-veriş etdiyimiz bu mağaza şəbəkəsində bu cür qiymət uyğunsuzluqlarınin yaşanması həm istehlakçı hüquqlarının pozulması, həm də mağazaya olan inam və etimada ciddi zərər vurur. Məsələyə dair etdiyim müraciətə konkret izah verilmədi və müxtəlif qeyri-qənaətbəxş bəhanələr irəli sürüldü".
Jurnalist "Tamstore" rəhbərliyindən qiymət uyğunsuzluqları ilə bağlı təcili şəkildə araşdırma aparılmasını xahiş edib:
"Vitrin və kassa qiymətlərinin uyğunluğuna ciddi nəzarət edilsin. Sakinlərin narazılıqlarına rəsmi və aydın cavab təqdim olunsun".// Avtosfer.az
