MÜSİAD Azərbaycan İctimai Birliyi ilə Kiçik və Orta Biznesin İnkişafı Agentliyi (KOBİA) arasında görüş keçirilib.
Yurd.Media xəbər verir ki, görüşdə MÜSİAD Azərbaycan İdarə Heyətinin sədri Rəşad Cabirli, İdarə Heyəti və Müşahidə Şurasının üzvləri, Kiçik və Orta Biznesin İnkişafı Agentliyinin (KOBİA) İdarə Heyətinin sədri Orxan Məmmədov və Agentliyin Dövlət-Özəl Tərəfdaşlığı İnkişaf Mərkəzinin direktor müavini Anar Yusufzadə iştirak ediblər.
Görüş zamanı Rəşad Cabirli son 4 il ərzində MÜSİAD Azərbaycan tərəfindən həyata keçirilmiş layihələr, dərnəyin fəaliyyət istiqamətləri, müəyyən edilmiş strateji hədəflər və gələcəkdə planlaşdırılan təşəbbüslər barədə geniş məlumat verib.
O, KOBİA-nın ölkəmizdə sahibkarlıq mühitinin formalaşması və inkişafında mühüm rol oynadığını vurğulayıb. Həmçinin, MÜSİAD Azərbaycan ilə KOBİA arasında uzun illərdir davam edən əməkdaşlıq çərçivəsində həyata keçirilmiş birgə layihələr və işgüzar tədbirlərin Azərbaycan–Türkiyə sosial-iqtisadi əlaqələrinin güclənməsinə, biznes platformalarının genişlənməsinə və türk iş dünyasının ölkəmizdə daha fəal iştirakına əhəmiyyətli töhfə verdiyini qeyd edib.
Görüşdə həmçinin yeni layihələrin icrası və mövcud əməkdaşlığın genişləndirilməsi ilə bağlı qərarlar qəbul edilib.
