Son illər Azərbaycanda xüsusi cinslərə məxsus ev heyvanlarına maraq əhəmiyyətli dərəcədə artıb.
Yurd.Media xəbər verir ki, hazırda sosial şəbəkələrdəPers cinsli pişiklər 1000-1500 manat arasında qiymətə təklif olunur. Bu da onları ölkədə ən bahalı ev heyvanlarından birinə çevirir.
Pers cinsli pişiklər (Persian cats) yumşaq tükləri, iri gözləri, sakit təbiəti və estetik görünüşü ilə tanınır. Onlar dünyanın bir çox ölkəsində elit cins sayılır və xüsusi qulluq tələb edir.
Satıcıların sözlərinə görə, bu cins pişiklərə əsasən gənc ailələr, tək yaşayan şəxslər və heyvansevər qadınlar maraq göstərir. Bəziləri bu heyvanlara yalnız ev dostu kimi deyil, həm də status göstəricisi kimi baxır.
Baytar mütəxəssislər bildirirlər ki, bu cins pişiklər genetik xüsusiyyətlərinə görə sağlamlıq baxımından daha həssasdır. Buna görə də onların saxlanılması yalnız estetik görünüş üçün deyil, eyni zamanda məsuliyyət və düzgün qulluq tələb edir.
